Neilich
D´Hausfrau isch a Weihnachta druff b´dacht,
wenn B´suach kommt, dass se no a Bowl macht.
Denn siea hot schoo lang entdeckt,
wia guat a Weihnachtsbowle schmeckt.
Drzua braucht se an guata Wei
ond verschiedna Früchtla noo dranei
Dees kommt elles en a Glasgefäß
- ond noo a Fläschle Sekt, des net zu räß.
Manchmol au no an Schucker Rum,
ond hinterher do rührt se´s kräftig um.
Hot se´s omgrührt,
wird öfters drvoo probiert.
Dees Probiera hot zur Folg´ g´het,
se war zum Mo jetzt b´sonders nett.
Se hot ehm emmer wieder a Glas ei´gschenkt
ond nemme an d´Verwandschaft denkt.
der Inhalt hot schnell ah´gnomma,
weil dr B´such au isch so lang net komma.
Zwoi Stond später fahrt an Auto her,
d´rweilscht isch d´Bowleschüssel leer.
S´Fraule ond ihr Moo vom Alkohol ganz heiter,
saget sich, ´s isch vielleicht g´scheiter,
mit machet´s Licht aus ond deant so,
als wär bei ons hait niemand do.
Se lasset dr B´suach vor dr Haustüra schella
ond dr Hond em Kerbla bella.
Se legat sich miad ond z´frieda nei ens Bett
ond send sich einig: Au ohne B´suach isch´s ell´s ganz nett.
